Popp- og rokksaga Íslands

Íslensk dægurtónlist er heimsþekkt vörumerki í dag. Áður en til þess kom, höfðu íslensir popparar reynt fyrir sér í áratugi erlendis - án merkjandi árangurs. Í dag eru íslenskar sveitir og listamenn heimsþekkt fyrirbrigði sem nefnd eru í sömu andrá og Ísland og óspillt náttúran. Hvernig gat þetta gerst - hverjir eru aðalnúmerin í gegnum tíðina?

Í þessari seríu er farið yfir sögusviðið frá landnámi til nútíðar. Hvernig þróast tónlistin og hvað veldur því að sumir tónlistarmenn ná samhljómi við þjóðina áratugum saman á meðan aðrir staldra skemur við? Fylgst er með hvernig swingið og jazzinn náðu yfirhöndinni - síðan rokkið og koll af kolli eftir það. Viðbrögðin eru yfirleitt þau sömu - kynslóð eftir kynslóð: eldri kynslóðirnar telja "sína" tónlist betri en það sem á eftir kemur. Það sé hávaði og garg. Þannig heldur sagan áfram - alltaf eins, en með nýju fólki í framlínunni. Þegar fyrsta íslenska súperstjarnan - Björk - brýst loks í gegn, verður eftirleikur þeirra sem á eftir koma auðveldari. Sigur Rós, Of Monsters and Men, FM Belfast, Ásgeir og fleiri uppskera nú ríkulega og halda fánanum hátt á lofti. Framtíðin er björt ef hlúð er að grasrótinni.